ពលរដ្ឋនៅសហគមន៍ដីធ្លីរៀបចំក្ដារមឈូស "សិទ្ធិនារី" និង "តុលាការ" ព្រមទាំងបដា ទាមទារឲ្យរដ្ឋាភិបាលគោរពសិទ្ធិមនុស្ស និងដោះលែងសកម្មជនដីធ្លី នៅខាងមុខក្រសួងកិច្ចការនារី នៅថ្ងៃ៨ មីនា ២០១៥
អាជ្ញាធរខណ្ឌដង្កោ នៅព្រឹកថ្ងៃទី៨ មីនា បានរឹបអូសយកក្តារមឈូសសិប្បនិម្មិតពីក្រុមអ្នកតវ៉ាសហគមន៍ដីធ្លី ខណៈដែលអ្នកតវ៉ាទាំងនោះកំពុងហែក្បួនពីអគារក្រសួងកិច្ចការនារី ក្នុងខណ្ឌមានជ័យ ឆ្ពោះទៅកាន់ពន្ធនាគារព្រៃស ក្នុងខណ្ឌដង្កោ។
ក្តារមឈូសចំនួន ២ ដែលសមត្ថកិច្ចបានរឹបអូសនោះ ត្រូវបានអ្នកតវ៉ាធ្វើឡើងដើម្បីជានិមិត្តរូបបង្ហាញថា ការគោរពសិទ្ធិនារីនៅកម្ពុជា បានស្លាប់ ហើយតុលាការនៅកម្ពុជា ក៏បានស្លាប់ដូចគ្នា។
ព្រះសង្ឃ សហគមន៍ដីធ្លី និងប្រជាពលរដ្ឋប្រមាណជាង ២០០នាក់ បានទៅប្រមូលផ្តុំគ្នាតាំងពីព្រឹកនៅមុខអគារក្រសួងកិច្ចការនារីថ្មី ដែលឋិតនៅក្នុងសង្កាត់ស្ទឹងមានជ័យ ខណ្ឌមានជ័យ។ គោលបំណងនៃការជួបជុំនៅទីនោះ គឺដើម្បីដាក់សេចក្ដីថ្លែងការណ៍ឲ្យក្រសួងកិច្ចការនារីជំរុញឲ្យរដ្ឋាភិបាលកម្ពុជា គោរពសិទ្ធិស្ត្រីឲ្យបានពេញលេញ និងឲ្យដោះលែងសកម្មជនដីធ្លី និងព្រះសង្ឃទាំង ១២នាក់/អង្គ ឲ្យមានសេរីភាពឡើងវិញ។
ក្នុងពេលប្រមូលផ្តុំនៅមុខក្រសួងកិច្ចការនារីនោះ ក្រុមអ្នកតវ៉ាដែលភាគច្រើនពាក់អាវយឺត និងបូពណ៌ខ្មៅ មានសរសេរអក្សរថា ដោះលែងសកម្មជនដីធ្លី ហើយខ្លះទៀតកាន់ផ្កាឈូក ខ្លះកាន់ទង់ព្រលឹង បាននាំគ្នាឈរជុំវិញក្ដារមឈូសចំនួន២ ដែលក្រុមតវ៉ាបានរៀបចំជាស្រេចដាក់ផ្ដេកទន្ទឹមគ្នានៅចំពីមុខក្រសួងកិច្ចការនារី ដែលមើលទៅហាក់កំពុងត្រៀមរៀបចំធ្វើពិធីបុណ្យសពមួយអ៊ីចឹង។
នៅលើក្តារមឈូសទាំង២នោះ មានសរសេរអក្សរថា សិទ្ធិនារី និង តុលាការ ដែលក្រុមអ្នកតវ៉ាចង់បង្ហាញថា ការគោរពសិទ្ធិនារីនៅកម្ពុជា បានស្លាប់ ចំណែកតុលាការនៅកម្ពុជា ក៏បានស្លាប់រួចហើយដែរ។ យ៉ាងណាក៏ដោយ ក្នុងពេលតវ៉ានោះ ក្រុមអ្នកតវ៉ាមិនបានជួបជាមួយមន្ត្រីក្រសួងកិច្ចការនារីដើម្បីដាក់សេចក្ដីថ្លែងការណ៍របស់ពួកគេឡើយ ព្រោះវាជាថ្ងៃឈប់សម្រាក គ្មានអ្នកណាមកធ្វើការនោះទេ។
ក្រោយពីការជួបជុំប្រមាណជាងមួយម៉ោង ក្រុមអ្នកតវ៉ាក៏បានធ្វើដំណើរចាកចេញពីក្រសួងកិច្ចការនារី ហែក្បួនតាមបណ្ដោយផ្លូវវ៉េងស្រេង ឆ្ពោះទៅកាន់ពន្ធនាគារព្រៃស៖ «សម្រែកអ្នកតវ៉ា»។
ក្បួនដង្ហែនាំមុខដោយរ៉ឺម៉កកង់បីដាក់ក្តារមឈូសនៅលើដំបូល អមដំណើរដោយព្រះសង្ឃ និងអ្នកចូលរួមខ្លះកាន់ផ្កាឈូក ខ្លះកាន់ទង់ព្រលឹងពណ៌ស ដើរបន្តពីក្រោយ ដែលមើលទៅប្រៀបបានទៅនឹងការដង្ហែសពយកទៅបូជា។ ក្នុងការហែក្បួននោះ បើទោះជាសមត្ថកិច្ចមិនបានរារាំងដំណើរក៏ដោយ ប៉ុន្តែពួកគេបានរឹបអូសយកក្ដារមឈូសពីក្រុមអ្នកតវ៉ា រួចដឹកតាមរថយន្តយកទៅបាត់។ នៅពេលក្បួនធ្វើដំណើរទៅដល់ពន្ធនាគារព្រៃស នគរបាល និងកងសន្តិសុខប្រមាណ ១០០នាក់ ត្រូវបានគេដាក់ពង្រាយនៅទីនោះ ប៉ុន្តែពួកគេមិនបានបង្ក្រាប ឬបំបែកការប្រមូលផ្តុំរបស់អ្នកតវ៉ាឡើយ។ យ៉ាងណាក៏ដោយ បន្ទាប់ពីសម្រាកបាយថ្ងៃត្រង់រួច ក្រុមអ្នកតវ៉ាបានដង្ហែក្បួនជាថ្មីនៅក្បែរពន្ធនាគារព្រៃស មុននឹងបំបែកគ្នា។ ក្នុងពេលនោះដែរ ពួកគេបានដុតធូប និងទង់ព្រលឹងចោល ហើយបន្តស្រែកទាមទារឲ្យដោះលែងសកម្មជនដីធ្លីជាថ្មី។
តំណាងសហគមន៍បឹងកក់ អ្នកស្រី បូវ សោភា មានប្រសាសន៍ក្នុងពេលនោះថា អ្វីដែលក្រុមអ្នកស្រីកំពុងតវ៉ានេះ គឺមិនមែនប្រឆាំងរដ្ឋាភិបាលនោះឡើយ គឺគ្រាន់តែធ្វើដើម្បីឲ្យរដ្ឋាភិបាលដោះស្រាយជម្លោះដីធ្លី និងដោះលែងសកម្មជនដីធ្លីដែលកំពុងជាប់ពន្ធនាគារប៉ុណ្ណោះ។ អ្នកស្រីបន្តថា ស្របពេលដែលពិភពលោកកំពុងអបអរសាទរទិវាសិទ្ធិនារីអន្តរជាតិ ៨ មីនា លើកទី១០៤ អ្នកស្រីស្នើឲ្យលោកនាយករដ្ឋមន្ត្រី ហ៊ុន សែន បន្ធូរដៃដល់សហគមន៍របស់អ្នកស្រី៖ «ថ្ងៃនេះជាថ្ងៃសិទ្ធិនារី សុំឲ្យលោកនាយករដ្ឋមន្រ្តី ហ៊ុន សែន បន្ធូរដៃ ព្រោះថា កូនៗរបស់ពួកគេកំពុងត្រូវការ ហើយអ្វីដែលពួកគេបានតវ៉ា គឺដើម្បីសិទ្ធិរស់រានមានជីវិតប៉ុណ្ណោះ គឺមិនមែនរស់ដើម្បីប្រឆាំងលោក ហ៊ុន សែន នោះទេ»។
ចំពោះការរឹបអូសយកក្តារមឈូសពីអ្នកតវ៉ាដោយអាជ្ញាធរវិញ ត្រូវបានអនុប្រធានផ្នែក ស៊ើបអង្កេតនិងក្រុមមេធាវីសមាគមអាដហុក (Adhoc) លោក ណៃ វ៉ង់ដា កត់សម្គាល់ថា វាប្រហែលជាអាជ្ញាធរយល់ថា មឈូសគឺតំណាងឲ្យសេចក្ដីស្លាប់ ឬក៏ជាសញ្ញា ឬប្រផ្នូលមិនល្អសម្រាប់រដ្ឋាភិបាល និងអាជ្ញាធរ ទើបពួកគេរឹបអូសយកពីអ្នកតវ៉ាដូច្នេះ។ យ៉ាងណាក៏ដោយ លោកថា នេះគ្រាន់តែជាសេរីភាពក្នុងការសម្ដែងមតិរបស់ពលរដ្ឋប៉ុណ្ណោះ៖«សហគមន៍ អង្គការសង្គមស៊ីវិល រដ្ឋាភិបាលមានសិទ្ធិរៀបចំរៀងៗខ្លួន។ ការដកហូតក្តារមឈូសពលរដ្ឋនេះ គឺជាការរំលោភសិទ្ធិរបស់សហគមន៍ ព្រោះថា ពួកគាត់មានសិទ្ធិរៀបចំតាមបែបរបស់ពួកគាត់»។
ចំណែកអ្នកគ្រប់គ្រងបច្ចេកទេសការិយាល័យស៊ើបអង្កេតនៃអង្គការសិទ្ធិមនុស្សលីកាដូ (Licadho) លោក អំ សំអាត ដែលបានចូលរួមឃ្លាំមើលការតវ៉ារបស់សហគមន៍ដែរនោះយល់ឃើញថា ខណៈដែលពិភពលោកកំពុងអបអរសាទរទិវាសិទ្ធិនារីអន្តរជាតិ ផ្ទុយទៅវិញ នៅប្រទេសកម្ពុជា នារីដែលបានតវ៉ាដើម្បីការពារសិទ្ធិសេរីភាព និងសិទ្ធិលំនៅឋាន បែរជាត្រូវអាជ្ញាធរចាប់ដាក់គុក។ ចំពោះការរឹបអូសយកក្ដារមឈូសពីអ្នកតវ៉ាវិញ លោក អំ សំអាត ថ្លែងដោយអស់សំណើចថា អាជ្ញាធរមិនគួរណាខ្លាចក្ដារមឈូសដល់ថ្នាក់នេះសោះ។ ប៉ុន្តែអ្វីដែលអាជ្ញាធរត្រូវធ្វើ គឺត្រូវគោរពច្បាប់ អនុវត្តច្បាប់ និងត្រូវគិតគូរពីសុខទុក្ខរបស់ពលរដ្ឋ ជាពិសេសត្រូវដោះស្រាយបញ្ហាដីធ្លីឲ្យពួកគាត់ដោយសន្តិវិធីនិងយុត្តិធម៌៕
ប្រភព អាស៊ីសេរី
0 comments:
Post a Comment