ថ្ងៃចន្ទ ទី៩ ខែមីនា ឆ្នាំ២០១៥ ម៉ោង ១៣:៤៦
ខេត្តកណ្ដាល ៖ ផ្ដើមចេញពីជម្លោះរឿងដឹកគោឲ្យផឹកទឹក បុរសជាឪពុកចុងបានកាប់កូនមួយកណ្ដៀវចំខ្នងបណ្ដាលឲ្យរងរបួសធ្ងន់ ហើយត្រូវបាននគរបាលចាប់ខ្លួនភ្លាមៗ កាលពីម៉ោង៥ និង២០នាទីរសៀល ថ្ងៃទី៨ មីនា នៅចំណុចទួលក្រឡាពាស ស្ថិតក្នុងភូមិរកាលើ ឃុំខ្ពបស្រុកស្អាង ។
មន្ត្រីនគរបាលព្រហ្មទណ្ឌស្រុកស្អាងបានឲ្យដឹងថា ជនល្មើសដែលត្រូវបានចាប់ខ្លួនឈ្មោះឆែម វ៉ិត ភេទប្រុស ឣាយុ៤៨ឆ្នាំ មានទីលំនៅភូមិរកាលើ ឃុំខ្ពប ស្រុកស្អាង ត្រូវជាឪពុកចុង មុខរបរកសិករ។ ចំណែកជនរងគ្រោះឈ្មោះវ៉ិត ម៉េងគ្រី ភេទប្រុស ឣាយុ៣៣ឆ្នាំ នៅភូមិ-ឃុំជាមួយគ្នា បានរងរបួសខ្នង។
ប្រភពដដែលបានឲ្យដឹងទៀតថា នៅថ្ងៃកើតហេតុនោះឈ្មោះឆែម វ៉ិត ជាឪពុកចុងជនរងគ្រោះ បានផឹកស្រាស្រវឹង និងបានប្រើឲ្យជនរងគ្រោះដឹកគោទៅឲ្យផឹកទឹក ពេលនោះជនរងគ្រោះ បានតមាត់ និងមិនព្រមដឹកគោទៅឲ្យផឹកទឹកទេ គ្រានោះក៏មានទំនាស់ពាក្យសម្ដីគ្នារវាងជនល្មើស និងជនងរគ្រោះឈានដល់វាយតប់គ្នាទៅវិញទៅមកហើយជនល្មើសបានរត់ទៅយកកណ្ដៀវមួយមកកាប់លើជនរងគ្រោះចំខ្នងមុតរងរបួសធ្ងន់។
ភ្លាមៗនោះមានការភ្ញាក់ផ្អើលដល់សមត្ថកិច្ចប៉ុស្តិ៍រដ្ឋបាលខ្ពបបានចុះទៅដល់កន្លែងកើតហេតុឃាត់ខ្លួនជនល្មើស និងវត្ថុតាងនាំមកប៉ុស្តិ៍ ចំណែកជនរងគ្រោះបានបញ្ជូនទៅព្យាបាលនៅមន្ទើរពេទ្យជ័យជំនះក្រុងតាខ្មៅ៕
0 comments:
Post a Comment